黃頭陸龜飼養小手冊

STAR_115

我第一次養既陸龜就係黃頭,一來貪易養,二來價錢平D~但係一養就鐘意左,現時有3隻黃頭....黃頭令人著迷的地方一定係對眼仔,好黑好圓,特別可愛~

黃頭陸龜，又叫黃頭象龜或緬甸陸龜

學名:Indotestudo elongate

原產地: 東南亞熱帶地區，在印度東北部，孟加拉，緬甸，柬埔寨，老撾，越南，泰國和馬來西亞的一些地區。中國分佈在雲南、廣西。

合適溫度:26C-30C

底材:報紙,泥炭土,椰泥,椰殼,瓷磚

環境佈置:底材,水盤(保濕),山洞

佈置心得:

       大家都知黃頭係尿王,又多又臭.個人就覺得底材用報紙係最方便,一痾即換.但係用報紙的話,環境相對較乾,所以要放大水盤,更好係2,3日浸水一次.

      報紙有油墨,有人覺得會影響龜的健康,唔放心的人可以底鋪報紙,上面再鋪反轉瓷磚,只係要每次換都要洗瓷磚.

食材:

        大部分蔬果,野草都可以,菜心,椰菜,油麥菜,通菜,蕃薯葉,南瓜,紅蘿蔔,車前草,蕃茄,蕉,龜糧,動物性蛋白(蚯蚓,蟀,蝸牛等)…..

        一日一餐,以菜同野草為主,生果少食,龜糧一星期一次, 動物性蛋白一個月一次

購買黃頭注意事項:

香港要買黃頭多數會經論壇同網友買,但單從相片較難判斷龜的健康狀況,所以交收時有幾個地方一定要檢查

1)眼仔要精靈

精神係判斷龜有冇病的重要因素,睇龜有冇精神就要睇眼神,眼睛有神,冇凹陷就可以

2)手腳要有力

手腳代表龜的健康情況唔會太差,除了用拉手腳試力外,亦可以叫賣家網上提供龜龜行路姿態的相,以四肢可以支撐起身體,殼離地為佳

3)確保冇腐甲

唔建議新手買腐甲龜,因為腐甲可大可小,嚴重會好快死.留意龜有冇臭味,係一種腐爛的味,有的話就唔好要啦~

4)排泄孔乾淨

排泄孔乾淨表示龜的腸胃狀態唔差,起碼冇腹瀉

圖1     圖2
圖1:眼睛凹陷  圖2:眼睛飽滿

四肢有力

      過冬心得:

      對於唔少龜友黎講過冬係一個考驗,冬眠就更難.我未嘗試過俾黃頭冬眠,所以我D黃頭過冬係用以下的方法:

1)  節食

        健康的黃頭係可以在不加溫的情況下成功過冬,關鍵在於飲食的控制.低過20C就應該節食,一星期先喂一次係絕對可以,兩星期一次都OK.每次進食時建議加BAC,同進食後泡暖水,都可以促進消化.節食的原因在於避免因為冬天低溫會令黃頭的消化能力變差,需時更耐先可以消化一餐食物.而經常喂食會令黃頭腸胃負荷太多而有腸胃病.一,兩星期喂一次可有足夠的時間消化,減低負荷.

2)  浸暖水

       冬天期間,黃頭多數都會訓覺,可以2日浸一次暖水,俾機會龜龜飲水同排泄,同時檢查一下龜的精神同健康狀態.

      謹記:浸水應在溫度穩定,冇風吹到的地方進行,一定要在浸水後徹底抺乾龜
身,以免感染肺炎.

STAR_115

黃頭要注意的疾病同治療方法:

1) 腐甲

    黃頭容易有腐甲, 原因係多數黃頭由內地引入, 大陸人對這種龜比較粗暴, 運輸時的碰撞同擠壓, 加上商人的擲龜手法, 令大部分黃頭都有外傷, 再惡化為腐甲.

    癥狀:有臭味, 眼見殼內有血水同變白

    治療方法:一言記之曰:狠! 用消毒過的界刀, 界開腐甲位置, 再剔除白色的壞死組織, 上優碘,OK

圖1      圖2

圖1:治療中,已可見健康組織  圖2:治療完成,去除所有腐甲,上左優碘

2) 腸胃炎

    腸胃炎係由於食左不潔食物或不合適的食物(如經常食水份高的蔬菜,人類食品),進食後溫度變化太大所引致,冬天時喂食過多亦會導致腸胃炎

   

    癥狀:便便較稀,顏色異常(黃色,綠色,等),有強烈臭味,食慾變差

    治療方法:提高環境溫度(秋冬)或保持溫度穩定(春夏),暫停喂食幾日,以BAC調理腸胃,幾日後再喂水份較少的食物(如椰菜),觀察便便的情況有冇好轉..

BAC:爬蟲益生菌,有助消化同調理腸胃,加在食物或水中服用

3)內部寄生蟲

   多數黃頭都係野生個體,一定會有寄生蟲. 少量的寄生蟲對龜冇危害, 但大量的寄生蟲就會削弱龜的健康,危及生命.

   癥狀:與腸胃炎的悄況大致相同,便便中會有啫喱狀液體, 經過一段時間飼養後的體重不升反跌, 部分更會痾蟲

   治療方法:基本上每一隻黃頭到手後都要杜蟲, 但應該等到龜適應新環境同確定身體健康先,大概要一至兩個月~以我所知,杜蟲有兩種方法, 第一種係喂蒸熟的南瓜(要連瓜瓤),效力較差但比較天然同安全. 第二種係喂腸蟲清(一種內地的人用杜蟲藥),

10cm以下喂1/6片,10cm以上喂1/4片,25cm以上喂1/2片, 效力較強有效但有機會出現副作用. 有人指龜服用杜蟲藥後會出現食慾不振的情況,有以上情況出現可以用BAC調理一下,過一,兩星期就會冇事.

    我係用腸蟲清杜蟲,份量會用少D,始終藥力比較勁~唔放心的龜友可以搵獸醫杜,而市面上都有售爬蟲杜蟲藥

4)體外寄生蟲

    野生黃頭身上可能會有蝨或蜱,蝨係一粒粒黑色,芝麻大小. 蜱本來得芝麻咁大,吸血後大如豆豉,狗身上亦好常見~

    治療方法:好簡單,用驅風油或酒精滴係蟲蟲上令蟲鬆口, 過一陣就好易拔走,再上優碘 唔好夾硬拔去,因為蜱咬得好實,夾硬拔去雖然會拔去個身,但個口器仍會留係龜肉中.....

    由於蟲蟲個樣太醜惡,不便貼出,請龜友自行搵圖XD,

參考資料:個人經驗,http://book.cngui.com/,http://bbs.reptilesworld.com/

暫時寫住咁多,尚有好多資料補充,歡迎各位師兄指出錯處同提供意見,多謝~有任何關於黃頭的問題可以PM討論,大家交流一下

轉載請註明由香港龜友論壇STAR_115編寫,THX

牛龜仔

1)節食

        健康的黃頭係可以在不加溫的情況下成功過冬,關鍵在於飲食的控制.低過20C就應該節食,一星期先喂一次係絕對可以,兩星期一次都OK.每次進食時建議加BAC,同進食後泡暖水,都可以促進消化.節食的原因在於避免因為冬天低溫會令黃頭的消化能力變差,需時更耐先可以消化一餐食物.而經常喂食會令黃頭腸胃負荷太多而有腸胃病.一,兩星期喂一次可有足夠的時間消化,減低負荷.
我估黃緣都可以咁做@@

R之迷

牛龜仔 發表於 2011-7-17 14:36
1)節食

        健康的黃頭係可以在不加溫的情況下成功過冬,關鍵在於飲食的控制.低過20C就應該節食,一星期 ...

bac是什麼東東=0=?

STAR_115

BAC=NutriBAC
一種爬蟲益生菌,可以幫助消化同調理腸胃

billychan

感謝分享...............

宝宝林

我只黑仔跌左落楼，黄头好活泼咖，所以中意爬，攀登能力好强，依咖得翻朱古力女啦！

KK.

thanks for sharing
特別係過冬心得

kenbb

宝宝林 發表於 2011-7-17 22:32
我只黑仔跌左落楼，黄头好活泼咖，所以中意爬，攀登能力好强，依咖得翻朱古力女啦！ ...

要唔要買番隻公呀$v$..我有..(唔好意思,借位sell一sell)

STAR_115

已加圖同補充內容

sam0123456

c兄我衣家用緊個大膠箱下面放左塊廁所用既隔水板再放D水係底咁樣好唔好呀

STAR_115

回復 sam0123456 的帖子

哩個設計都幾好，不過可以唔要水，放水盤就得，可以選擇報紙鋪底。

kenbb

sammy717 發表於 2011-7-18 23:28
咩價錢同大小?

唔好意思,公已比人HOLD左..
得番2隻母.

Norrishill

餵食不合適的食物都有機會出現腸胃炎, 如干沙牛河(真係有人餵).

另生蟲都會出現便便較稀,顏色異常(黃色,綠色,等),有強烈臭味,食慾變差等癥狀. 特別黃頭同一些較什食性陸龜.

STAR_115

回復 Norrishill 的帖子

多謝指點,等我補充埋先THX~

嫻仔

佢d屎屎尿尿真係好臭,,,次次d屎都要踩腳仙走

kenbb

點解我之前買果支bac唔同你尼支=.=''

ah林-3-

kenbb 發表於 2011-7-19 19:41
點解我之前買果支bac唔同你尼支=.=''

你之前賣比我果支係咪吾同牌子-.-

kenbb

ah林-3- 發表於 2011-7-19 19:47
你之前賣比我果支係咪吾同牌子-.-

唔知.係藍3鋪

STAR_115

嫻仔 發表於 2011-7-19 19:38
佢d屎屎尿尿真係好臭,,,次次d屎都要踩腳仙走

講起就激氣，我個三隻頭先痾完係咁踩，搞到成個箱都係屎，洗死人啦= =