香港龜友論壇

標題: 我覺得我隻龜養到好似狗 + 龜殼問題 [打印本頁]

作者: patyau10 時間: 2014-8-19 16:43
標題: 我覺得我隻龜養到好似狗 + 龜殼問題
本帖最後由 patyau10 於 2014-8-19 17:16 編輯

養左接近兩年，平時放佢通屋走的。而家我一返屋企，唔夠兩分鐘，佢就會出來迎接我（其實想我餵），放佢入缸裡面，有時餵龜糧，有時用手餵蝦乾，餵完放返出來，佢一定系我腳底留系度等我再拎起佢玩一陣，摸下佢，摸完先肯走開，如果唔同佢玩佢會留好耐都唔走的。有時又會爬上我腳背望望貢。到我沖涼時，佢會即刻走入來一齊沖（因為以前試過好多次系門口等, 所以我而家唔會關門），沖完又一齊出去。仲有，最近仲習慣埋日日會系廁所裡面拉屎拉尿（D尿好臭的）。尋晚我老婆返完鄉下幾日返到屋企，佢仲即刻走上我老婆腳背打招呼添。我覺得真系好神奇呀～～～

另外佢最近好似生長到兩邊龜殼翹起（捲起）左。。。甘樣落去有無問題架請問？

作者: 龜龜ying 時間: 2014-8-19 16:53
回復 patyau10 的帖子

樓主係咪講緊頭像果隻龜龜～？～？
真係好乖喔，咁有靈性又咁"痴"主人。。
唔知我２隻龜龜第時會唔會"痴"住我，要我同佢玩呢

（係就好了）

作者: patyau10 時間: 2014-8-19 17:12
回復龜龜ying 的帖子

yes 呀系我頭像呢隻龜。其實唔知關唔關事我當初堅持日日用手餵蝦比佢食左幾個月，培養到感情。或者你都試下吖。我以前見大陸有新聞話有人養龜有性到主人返屋企隻龜開心到兩腳企起身添呀！

作者: seira2242527 時間: 2014-8-19 17:15
我都覺得我養緊狗仔...
我隻草草會根住我行

鍾意俾人摸頭仔同頸..

作者: 龜龜ying 時間: 2014-8-19 17:24
回復 patyau10 的帖子

我都係用手餵架，所以而家小Ｂ(黃耳)見到我(隻手)都好興奮，成日以為有蝦干食

另一隻細細粒(巴西)以家大左，用手餵唔多啋我＞︿＜
每一晚我都會捧佢地上黎瞓，一路摸佢地個龜殼比Ｄ温暖佢，佢地就好快瞓着了

作者: yungyung 時間: 2014-8-19 22:47

作者: 浩洋凰 時間: 2014-8-19 23:39
回復 patyau10 的帖子

請問師兄，這隻是什麼龜來？是水龜種嗎？

作者: 金金 時間: 2014-8-20 00:25
水龜長期乾養，或水深唔過背，龜殼就會變形，不影響健康，只係外觀問題

作者: 小迪迪 時間: 2014-8-20 00:50

patyau10 發表於 2014-8-19 16:43
養左接近兩年，平時放佢通屋走的。而家我一返屋企，唔夠兩分鐘，佢就會出來迎接我（其實想我餵），放佢 ...

請問師兄上述你養緊呢隻係咩嘢龜龜呢?

作者: tiffany_john 時間: 2014-8-20 00:50

金金發表於 2014-8-20 00:25
水龜長期乾養，或水深唔過背，龜殼就會變形，不影響健康，只係外觀問題

有D龜識得自己去浸水，如果主人有預備好水盆，唔知樓主有無甘做

作者: patyau10 時間: 2014-8-20 01:14

浩洋凰發表於 2014-8-19 23:39
回復 patyau10 的帖子

請問師兄，這隻是什麼龜來？是水龜種嗎？

我上網揾返啦，我呢隻應該叫珍珠龜，或者普通草龜，應該系屬於水龜。。。掛。。。

作者: patyau10 時間: 2014-8-20 01:15

金金發表於 2014-8-20 00:25
水龜長期乾養，或水深唔過背，龜殼就會變形，不影響健康，只係外觀問題

多謝你解答呀！

作者: patyau10 時間: 2014-8-20 01:18

tiffany_john 發表於 2014-8-20 00:50
有D龜識得自己去浸水，如果主人有預備好水盆，唔知樓主有無甘做

因為我個缸比較高佢自己入唔到去，等我試下揾個矮D既缸看看佢會唔會自己去浸水先~~

作者: 浩洋凰 時間: 2014-8-20 03:14
回復 patyau10 的帖子

師兄，想請問：你的愛龜以前還未懂上廁所時，牠在家中大小二便，你與你太太是怎樣去處理的呢？

作者: patyau10 時間: 2014-8-20 09:45
回復浩洋凰的帖子

之前有好長時間佢都系食完就在缸裡面大小二便埋，跟手我就換水，再有一段時間佢出來多既時候就唯有見到地下有屎就抹咋。聽完幾位回覆有關殼既問題我真的要考慮多返點時間擺佢入缸裡面。。。不過最慘而家佢出慣左黎，一留系缸裡面耐點就會發顛

作者: 沙田鄂仔 時間: 2014-8-20 10:47
樓主你隻龜龜好懂人性呀, 咁乖巧.

作者: 浩洋凰 時間: 2014-8-20 18:32

patyau10 發表於 2014-8-20 09:45
回復浩洋凰的帖子

之前有好長時間佢都系食完就在缸裡面大小二便埋，跟手我就換水，再有一段時間佢出來 ...

我個人認為：如果師兄唔介意隻龜的外觀，及個殼會越來越翹的話，就照現時噉樣養就好了。
因沉水得多，又有其他問題要顧慮：例如角質化、冬天時要保持水溫夠暖25度，否則又會有機會冷嚫變肺炎！

作者: patyau10 時間: 2014-8-21 00:50
本帖最後由 patyau10 於 2014-8-21 00:51 編輯

浩洋凰發表於 2014-8-20 18:32
我個人認為：如果師兄唔介意隻龜的外觀，及個殼會越來越翹的話，就照現時噉樣養就好了。
因沉水得多，又 ...

師兄，多謝你意見呀，可否順便請教下你冬天時應點樣照顧佢呀？舊年冬天系第一年，個陣仲系養系水裏面多，我比佢照燈，佢少動，可以兩個禮拜唔食野。後來我上網看，其實系咪應該由得佢自己揾地方冬眠而唔好擺缸裏面照燈呀？因為網上話如果改變龜既冬眠會令佢壽命變短。。。我想問定應該點好

作者: 浩洋凰 時間: 2014-8-21 14:03

patyau10 發表於 2014-8-21 00:50
師兄，多謝你意見呀，可否順便請教下你冬天時應點樣照顧佢呀？舊年冬天系第一年，個陣仲系養系水裏面 ...

師兄，我未試過俾隻水龜冬眠，因我無信心，怕隻龜未夠健壯面對冬眠。
有師兄啲龜冬眠後，隻龜有眼炎啦,、又有龜爛肉爛屎忽啦、更有啲野埋肺炎添；所以隻龜唔夠壯既情況下去冬眠，不但不能益壽，反而即刻攞佢命！
我冬天時用暖管保持水溫25至30度，浮台上方安放UVB燈及保暖夜燈，日頭開哂兩棧燈，夜晚就只開保暖夜燈，平常餵食

作者: 沙田鄂仔 時間: 2014-8-21 14:31

patyau10 發表於 2014-8-21 00:50
師兄，多謝你意見呀，可否順便請教下你冬天時應點樣照顧佢呀？舊年冬天系第一年，個陣仲系養系水裏面 ...

我隻去年都係第一次過冬, 初時都好驚佢會死, 但係呢睇過一位師姐的類似的post後, 加上我呢隻係喺街執番來, 所以就試下俾佢自然過冬, 不過無俾佢浸住水, 反而亞爸幫佢做咗間小屋, 佢入咗去好多日都唔出來, 我每日裝下佢, 見佢手腳都縮晒, 連頭都唔見, 只見鼻孔. 稍為暖少少就出來痾一篤又返入屋, 無食過嘢. 如是者過咗成個冬天, 差不多立春先正式出來. 我地成家先放心.
不過其間我將佢成缸放入室內離開隻窗, 仲揾布同瓦通紙包住個缸, 淨番少少位通氣.

作者: 浩洋凰 時間: 2014-8-21 22:58

沙田鄂仔發表於 2014-8-21 14:31
我隻去年都係第一次過冬, 初時都好驚佢會死, 但係呢睇過一位師姐的類似的post後, 加上我呢隻係喺街執番來 ...

唔怪知得啦，我都覺得奇怪，你只養得兩年，但你隻龜卻十分大隻，原來你隻龜不只兩歲，已經天生天養過一輪；查實你隻龜已粗生粗養開，我相信你隻龜夠壯去冬眠了；我念你跟返上年噉幫隻龜冬眠，就應該沒甚大外了。
師兄，我不明白最後尾個句：
不過其間我將佢成缸放入室內離開隻窗, 仲揾布同瓦通紙包住個缸, 淨番少少位通氣.
可否再說明下，可以嗎？

作者: 沙田鄂仔 時間: 2014-8-22 13:13
本帖最後由沙田鄂仔於 2014-8-22 13:13 編輯

浩洋凰發表於 2014-8-21 22:58
唔怪知得啦，我都覺得奇怪，你只養得兩年，但你隻龜卻十分大隻，原來你隻龜不只兩歲，已經天生天養過一輪 ...

平時我地放個缸係騎樓近花槽位, 咁啲陽光可以照到佢, 唔晒用燈, 但亦因此有風吹. 所以到咗冬天為免冷親佢, 太陽下山後我地會將個缸搬番入室內(通常係廚房, 亞媽萬歲

!). 個缸係膠的, 對比佢身形都算大, 空洞洞, 佢又唔似人會有棉被包住暖笠笠, 所以我地會用啲瓦通紙圍住個缸, 而缸頂就鋪幾層毛巾, 只留一小部份唔鋪, 做好好似個小天窗, 加埋亞爸人手打造的備有小地牢的小黑屋

, 實行令佢裏面温度不至於缸外咁低.

歡迎光臨香港龜友論壇 (https://hkturtle.org/)