香港龜友論壇

標題: [有相]請各位望下, 初步擺位, 點樣可以再好d...thx! [打印本頁]

作者: zerothed 時間: 2015-6-21 00:12
標題: [有相]請各位望下, 初步擺位, 點樣可以再好d...thx!
本帖最後由 zerothed 於 2015-6-21 00:15 編輯

以上係初步set位, 我擺到一半果陣開始唔知點擺好, 個人都傻左

我而家個list :
Komodo 80x45x50 爬缸 (網頂改為夾板頂, 側透氣網位用珍珠板封再開120mm x 120mm位落風扇抽風)
Scythe 120mm x 12mm slim 風扇 (而家駁5v, 可以隨時駁8v或12v加強抽風)
松崎 STC-700時間/溫度/濕度多功能控制器
Zoo Med Reptisun 10.0 24吋光管
Taobao W-形光管反光罩
OSRAM EZP8 1x18w (Ballast Factor 0.97)
Komodo 50w 陶瓷膽(黑)
Phillips 60w Spot 1 Year 30degree beam angle
Komodo 森林樹皮屑(幼粒)
Zoo Med沙漠型草粒陸龜糧
OXBOW Orchard Grass Hay
Reptilix 龜糧
M糧細粒版
墨魚骨
Miner-All Indoor formula
BAC
Genoptic眼藥水
草粉(攪伴機打完放入袋)
車前草
西生菜

STC-700 setting : 陶瓷膽18:00-00:00 24c開 27關, 加濕機 73%開 75%關(加濕條喉直插樹皮底)
光管08:00開 18:00關
抽風長開
Philips 60w燈.........其實只係用黎set定個位, 基本上都唔開, 我今日試過開, 個缸會有37度

而家搞住咁多, d線要再執, 呢幾日就係周圍走買呢樣買果樣, 去裁木方同夾板又比間木行棟我呎吋, 要吋半木方但d木方得一吋三分...界夾板就多一分, 搞到我身水身汗先set好d位...

風扇果度其實都未決定係咪咁set, 本來係想用亞卡力板然後落一把140mm風扇, 但個位唔岩加上冇slim既140mm風扇, 最後用120mm slim, 用珍珠板係方便自己cut, 又平~ 本來係用兩把風扇既, 但就算用5v都抽得太勁, 所以最後用一把, 擺定d線可以駁8v/12v加強抽風.

應該有師兄/姐會發現我有幾隻糧...其實我都唔想...都怪自己冇經驗, 龜返黎先知係唔鐘意食M糧, 咁好啦, 比d生菜頂住先, 第日去買草粒, 買完草粒...又唔食!!! 好, 我再買乾草, 返黎打碎...又唔食!!!!!! 咁我就問賣龜果間既人比開乜野佢地食...啊...完來係呢隻Reptilix...仲要冇散賣, 一箱1kg...

不過都算啦, 起碼龜真係肯食先, 肯食就得架喇, 其它野我可以唔理, 最住要肯食~

今日又出去, 諗住買定d藥, 之前爬文話Genoptic藥房有, 但原來唔係間間有, 12點係上水搵, 成個上水都冇, 好, 我出MK, 呀...點知魚街果幾間都冇, 情急下出左個post問, 其間衝返過女人街果邊搵, 行到身水身汗終於搵到...之後返屋企先睇到有位師兄答我先知原來隔離街就有...lol, 都多謝果位師兄肯話我知下次可以去邊買~ thx~

而點解我要用夾板封頂, 原因係個缸對正冷氣位, 如果我唔封頂就會不停有冷氣入同埋得40%濕度, 而家封好, 個溫度keep住25c左右

Anyway, 講住咁多先, 希望各高手幫忙睇下我個setting, 睇下應該點擺先會好d~

Thanks~

[edited due to missing photos links]

作者: iris007 時間: 2015-6-21 00:30
25度對盾臂會否太低?

作者: beejjb 時間: 2015-6-21 08:31
咁大個箱可制造冷熱點～燈下放水盤（熱點）～龜怕濕冷但唔怕濕熱！對於BB 龜記得保持高濕！

作者: beejjb 時間: 2015-6-21 08:54
m糧無咩龜係唔食～

作者: pong888 時間: 2015-6-21 09:20
師兄，有無買黑藥同山洞。

作者: zerothed 時間: 2015-6-21 10:52

iris007

25度對盾臂會否太低?

爬文好多都話夜晚唔好凍過25c, 見過鬼佬網話唔好跌過22c...所以我都唔知跟邊過好, 如果25c佢地食得訓得冇病冇痛咁應該冇問題

beejjb

咁大個箱可制造冷熱點～燈下放水盤（熱點）～龜怕濕冷但唔怕濕熱！對於BB 龜記得保持高濕

Thx~
高濕要幾高? 80% +-5 有冇問題?

beejjb

m糧無咩龜係唔食～

我果兩隻未訓練到會食, 試左幾日都失敗, 琴日有進步, 四粒入面食左半粒, 淨返三粒半冇理過, 浸Reptilix就即食, 勁有性格~

pong888

師兄，有無買黑藥同山洞。

冇黑藥, 有山洞, 夜晚放山洞, 日頭拎走

作者: 金金 時間: 2015-6-21 17:58
除o左餅乾龜外，其他陸龜都唔應該放山洞！龜會長時間躲入山洞內，唔想進食，阻礙吸收UVB，更會越o黎越細膽，更怕人，容易嚇親病倒！

作者: 陸龜 時間: 2015-6-22 23:21
師兄條放濕喉會吾會令到樹皮太濕，令到d龜仔腐甲。我覺得頂頭件板冚得太密，會吾會用木方升高d會好d。抽氣太勁會吸埋d冷氣令到箱內温度難以保持。

作者: zerothed 時間: 2015-6-23 20:32

師兄條放濕喉會吾會令到樹皮太濕，令到d龜仔腐甲。我覺得頂頭件板冚得太密，會吾會用木方升高d會好d。抽氣太勁會吸埋d冷氣令到箱內温度難以保持。

加濕條喉改左, 出霧口升高到風扇底同曲90度打橫噴, 呢兩日睇到個濕度一直keep到70-75(STC-700), 另外個濕度計一直keep到80左右(HTC-2)

頂板有諗過留罅位, 但因為冷氣出風會直吹個缸, 岩岩整果陣試過, 一開冷氣即刻溫度急跌到20度...

抽風開頭係雙風扇, 但行5v都抽到打風咁, 所以先改為單風扇行5v, 暫時留意到夜晚開冷氣都唔會跌溫太快

暫時諗到咁樣擺位, 係日頭照燈果度未搞掂, 因為日頭室內成日都有33度, 如果我開照燈就會有成37度, 照點40幾, 要買個光暗制搞搞佢

作者: 陸龜 時間: 2015-6-23 23:01
本帖最後由陸龜於 2015-6-23 23:06 編輯

可能係封得太密所以抽吾到幾多氣。而我會係近燈底放個水盆條放濕喉離水盆底約１尺吹向下，吹落個水盆度。咁又吾會令到底材濕哂！（純粹個人意見）如果錯處請師兄們糾正！如果日間冇開冷氣我就吾會開射灯，凈係開粒慳電燈等個箱入面光猛ｄ，佢地就精神ｄ知到係曰頭。

作者: zerothed 時間: 2015-6-24 15:44

可能係封得太密所以抽吾到幾多氣。而我會係近燈底放個水盆條放濕喉離水盆底約１尺吹向下，吹落個水盆度。咁又吾會令到底材濕哂！（純粹個人意見）如果錯處請師兄們糾正！如果日間冇開冷氣我就吾會開射灯，凈係開粒慳電燈等個箱入面光猛ｄ，佢地就精神ｄ知到係曰頭。

抽氣果度原先同你諗一樣, 落板封頂可能抽唔到, 但留心睇既話會發現呢種缸係唔會封得到, 淨係玻璃趟門果條罅就足夠入風, 所以先會由原先雙風扇改為單風扇.

好易試氣流, 有加濕機既話又同我一樣有風扇又封得比較密既可以試下開加濕機到最大, 正常夠力既加濕機會整到成個缸都係霧, 呢刻留意d霧係點走就知個缸氣流夠唔夠.

加濕出口位就真係唔知點搞, 而家轉90度打橫噴之後成個底既樹皮都唔會濕, d霧基本上未沉落黎就化晒. 而家係得一個位濕, 就係條喉滴水果個位就濕, 我諗要改改個水盆放係個滴水位下面

得閒要搞下粒燈, 睇下佢地對照燈有咩反應

作者: ChickenPie 時間: 2015-6-25 10:40
純粹本人意見:
左邊可用樹皮.右邊可用磁磚.左右各放溫濕計‧
1.肚濟燈位置不變。在左手邊。
2.射膽可放返中間。中間射向左手邊。
3.水盤放右手邊。例如右上角。加濕喉放水盤上空直射。
4.濕控感應同而家一樣。右上角靠中間。太右的話左邊會長期好乾。
咁樣左邊最高溫度32-35 係熱區.濕度50-60.
右邊係散熱區28-30度,濕70-80.
濕度右邊高.左邊低。如不放心.左邊可多放一個小小水盤。
龜龜會自己選擇訓覺活動位置。

JUST FOR YOUR REFERENCE.

歡迎光臨香港龜友論壇 (https://hkturtle.org/)