香港龜友論壇

標題: [印度星龜]新手的經驗和教訓 [打印本頁]

作者: romanlydi 時間: 2015-7-10 01:10
標題: [印度星龜]新手的經驗和教訓
本帖最後由 romanlydi 於 2015-7-10 01:28 編輯

香港旺角金魚街某間有多間分店嘅藍色黑店,店員著藍衣嘅 “碧x”..
店舖職員如何慫恿，誤導，犯錯等等詳情我唔想打太多，只可以講為搵食，騙徒嘅手法層出不窮，我已經盡哂所有力。
作為一個新手，我承認自己有犯錯嘅時候，但係呢一間鋪頭的行為真係唔可以原諒。
大家只要去過觀察一次，睇下佢地用的底材，睇下佢地嘅環境，睇下佢地用邊種菜喂食，就可以證實到我講既野岩唔岩。
店員嘅處事方法以及遊說／誤導顧客因為是新手去買對龜龜買有害的用料，而這些底材是店舖一直使用，隱瞞害處。
實在讓我十分鄙視佢地只顧謀取利益以及不誠實嘅行為。
真係接受唔到佢呢間鋪的處事方式，完全唔尊重生命。

以下係我既經驗和教訓想同大家分享，希望大家唔好好似我咁因果循環下去

如果大家有人會諗住／已經岩岩係呢間店買左龜，請立即帶佢地去睇醫生檢查！
不管係難養的星龜，或者是其他品種的陸龜，若果在此店購買，我都建議大家帶龜龜先去檢驗。
第一，大家都知道星龜是陸龜中最難飼養，唔係好多店都可以把幼年星龜養大，包括所指的黑店，更有不少良心企業不售賣星龜。
更糟的是，年幼嘅陸龜若在有害的底材生長，碎沙混在食物裡不易消化容易導致腸胃炎，最終因為消化系統堵塞，

X光所見整個堵塞的消化系統已經佔多於整個正常龜身的2/3，
最終壓到肺部造成肺炎呼吸困難而死亡。
年幼的陸龜成長環境決定一切，可見得陸龜店舖來源非常重要。

起初兩隻星龜bb 買返來第一次的排便，出事的就係左邊，大便已經有d唔正常。

後來龜龜唔排便，帶佢去去沙田大圍珍xx獸睇醫生。
醫生無認真揾正確病嘅來源，只係俾幫佢打消炎針同比左我地電解質浸泡粉，x光照亦都係按圖解畫。
過左幾日，無大便，去覆診但都係活潑嘅，仲會係陌生地方行黎行去。
佢地就派一個鬼佬醫生出黎同我講:" your turtle is dying, nothing i can do about it”，如果係你你會點諗？

怪我自己沒有早點帶去睇荃灣享和。荃灣享和的護士同醫生都好熱心。
繼在大圍珍xx獸覆診後，依然唔想放棄，最後由享和的醫生準確地診斷龜龜嘅病因以及對症下藥，
享和的醫生亦從大圍珍xx獸得到的X光照知道龜龜後期有肺部呼吸的困難！
雖然太遲，救唔返龜龜，但係佢地的愛心我係感覺到。
佢地仲免受診金，對症下藥後的治療費用相當於大圍覆診費，
可見得大圍正常診金＋藥費（只係消炎）＋覆診費係享和嘅8陪多，揾唔到病因仲換來一句無情嘅話，真係好嬲。
[到龜龜過身果日，大圍珍xx獸仲未send到我地之前睇佢地既醫生內部報告比荃灣享和，反而荃灣享和所有人員非常熱心去分柝和follow up]
[消炎針，大圍醫生教我地打底甲上少少的位置，後來經荃灣享和糾正得知呢個打法叫做IM Injection，會有機會傷到龜龜神經線，會有機會癱瘓]
荃灣享和的護士同醫生仲好細心教我地如何打針係打落龜龜的皮下，仲比左幾包暖包龜龜保暖。

護士仲留左whatapps contact比我地，好熱心咁了解龜龜同幫助我地。
如果早d去享和，龜龜可能有得就救！

雖然龜龜走左，希望佢嘅經歷同遭遇可以俾大家對寵物店／獸醫有個概念，知道以後點抉擇。
鄭重地呼籲大家以上嘅店一定唔可以去。佢地唔單止以謀利為重仲好唔尊重生命。
我相信龜龜唔會白活的。

作者: 陸龜 時間: 2015-7-10 08:25
真可惜！

作者: chuntemp 時間: 2015-7-10 09:25
CHING 我前二日先去完享和, 隻盾有結石

你肯問, 佢地好樂意解答你既問題, 仲會比好多意見你

如果隻盾最後要開刀, 我都會揀享和

作者: pong888 時間: 2015-7-10 10:00
師兄，希望吾好影響您養龜心情，明天會更好。

作者: 圓圓龜 時間: 2015-7-10 10:32
師兄加油! 藍衫鋪和大圍間野一早被認定為黑店, 唔好幫襯!!!

作者: Chloe0607 時間: 2015-7-10 12:01
師兄不要難過~

作者: manyulung 時間: 2015-7-10 19:43
支持領養，爬協有星

歡迎光臨香港龜友論壇 (https://hkturtle.org/)