香港龜友論壇

標題: 求救！請問有關白眼病 [打印本頁]

作者: vwlchan 時間: 2017-6-7 09:55
標題: 求救！請問有關白眼病
我養咗2隻巴西龜已經廿幾三十年，兩隻龜殼都超過10吋，一直都無乜特別打理，只係有時換吓水。餵嘅嘢食都係有肉有菜咁，一直都好健康。

上年9月，有朋友俾咗隻細佢哋一倍嘅雄龜（我嗰兩隻應該係雌），開頭我都有見佢有時會用好長嘅指甲去搞我兩隻龜，但我見人哋話係雄性求偶，於是我無特別理會。

之後冬眠，咁直至３月左右我開始見到其中一隻雌龜隻眼無以前打得咁開，好似怪怪哋咁，當時又無乜留意。

上個月我見佢直頭對眼完全閉上，完全灰白色咁。我未試過咁嘅情況，都覺得奇怪點解佢會又冬眠，因為呢幾個月我都好忙，交由我媽餵食，佢只係同我講佢唔食嘢，我真係以為佢做乜又冬眠……

而家我再查先知道佢應該係患咗白眼病！佢仲要瘦晒咁，我媽都無發現。我而家好擔心，我尋晚已經瞓唔着，係我害咗佢咁。

請問大家我而家應該點樣做？我已經隔離咗佢哋，但我應唔應該浸水？定係要乾水？另外我見人哋話買龜精靈用，係咪直接滴落眼定係要滴落水俾佢浸？

另外佢唔食嘢，我係咪買營養水俾佢浸住飲，定係用匙放入佢個口，俾啲龜糧佢食？

如果我要帶佢睇獸醫，有無介紹係喺葵涌、荃灣區附近嘅龜醫生？

作者: marlin12 時間: 2017-6-8 19:45
本帖最後由 marlin12 於 2017-6-8 23:40 編輯

通常我唔會俾龜龜[冬眠]，因為有一定的風險。考慮下冬天用暖管吧！

龜龜眼睛完全灰白和唔食野，病情已經很嚴重，[龜精靈]應該處理唔到。

如果經濟許可，應該帶佢去睇[獸醫]，在荃灣享和街有一間是尊門睇爬蟲的。睇[獸醫]的好處，是可以找出真正的病因，如果病情嚴重，醫生會幫龜龜打針、和教你餵藥。但係，睇[獸醫]真係好貴，頭一次看醫生+檢查就要千多元，以後每次5、6百元(這是我2年前的價錢)。

你亦可以去賣龜藥品的店舖(例如:XX龜屋、XX水族)，買藥和尋求協助。最好帶埋龜龜去，俾佢地睇下。用藥後，如果病情未見好轉，就要快啲去睇[獸醫]。

其實我係唔建議[填食]，唔熟手會整傷龜龜的。用[營養水](例如:reptoboost)去浸龜，比較安全，但係記得唔好浸太耐，浸完要清洗乾淨。其實龜龜病好後，自然會進食。

作者: vwlchan 時間: 2017-6-9 09:38

marlin12 發表於 2017-6-8 19:45
通常我唔會俾龜龜[冬眠]，因為有一定的風險。考慮下冬天用暖管吧！

龜龜眼睛完全灰白和唔食野，病情已經很 ...

感謝你嘅回覆！
我已經打咗電話去享和，今日去睇架啦…
唉…好內咎自己無早啲發現佢有問題，一諗起佢以前眼仔碌碌周圍望就覺得心痛。
希望睇咗醫生可以快啲早返！

歡迎光臨香港龜友論壇 (https://hkturtle.org/)