香港龜友論壇

標題: 給新手養陸龜的建議 [打印本頁]

作者: mt4229 時間: 2013-8-24 13:36
標題: 給新手養陸龜的建議
本帖最後由 mt4229 於 2013-8-30 00:13 編輯

本人都係新手, 但係經過多月爬文同埋與多個資深龜友交流, 本人有d建議或者心得比新手養陸龜既朋友參考, 等佢地可以盡可能減少浪費同埋慳返d時間, 有機會行少d冤枉路...

重申以下只係建議, 並非絕對正確或者適用於所有龜, 因為每隻龜都唔同, 環境同其他客觀因素又唔同, 所以冇一個方法可以養哂所有龜, 多d觀察同了解龜龜既狀態方為上策...

環境
1.夏天一般27-30度, 冬天一般22-25度, 腿類可以低d
2.日夜要有合理溫差, 2-3度, 忌恆溫
3.濕度65-80, 結石品種同腿類建議較高濕度
4. 天臺花園放養當然好, 最少都建議冇冷氣同近窗
5. 5cm以下既BB需要高少少既溫度, 比上述既建議高約2度
6. 忌濕冷, 如果有冷氣冇熱燈就唔好高濕

龜種
遲d update

Setting
1. 要有合理既空間, 建議最少兩呎, 諗下過幾年隻龜會有幾大
2.通風係首要
3.如果唔開冷氣, 矮身膠兜係比爬箱好用, 因為: 一般平d, 易d打理, 對龜龜個空間感大d, 易換, 擺放自由度大d, 同最緊要係比較通風
矮身膠兜唔好處係: 保溫難d(可用防水防火膠布解決), 裝燈麻煩d同冇咁好睇
忌用高身魚缸同密封爬箱, 爬箱最少要三面通風, 忌有玻璃門

(之前既簡單setting)

4.基本裝備 (建議full set):

燈罩或座: 建議買爬蟲專用款式, 名牌較佳, 最起碼要三隻腳(香港插頭), 唔好貪平(小心火燭), 要留意watt數,燈泡長度及適唔適合現setting等

UVB 燈: 一般26W(建議) 10.0 UVB 慳電泡, 較光(密度較高), 一般擺放較低(夏季可做熱點), 建議橫放或用短罩令照射范圍加大(可用錫紙遮光), 離地約22-25cm
            一般10.0 UVB 光管, 照射范圍較大, 較暗(密度較低), 建議配合低火數射燈使用, 一般離地約至少一呎以上
            MegaRay 同 ZooMed T5HO, 市面較高檔既UVB光源, 一般擺放距離較遠, 建議用於較大既空間
            UVB幫龜龜做D3去吸收鈣, 其實幾多UVB或乜光譜對龜最好, 都未有實質既証據支持結論, 但係以上既産品都應該可以保持龜龜既D3係一定既水平, 所以買d多人用既就ok, 唔洗左試右試, 最好當然係曬太陽

射燈: 有人可能叫UVA燈(大部份都冇UVA), 一般提供光同熱, 如有需要使用,一般細地方建議低火數25w或40w, 如果大地方或日間溫度較低, 可用halogen(鹵素)款式, 建議有最少呎半既距離, 一般情況下射燈係好熱, 唔建議近距離或細爬箱內使用, 尤其係夏季(請嘗試將手放係射燈下三分鐘感受一下), 如果近距離或細爬箱, 用26W 10.0 UVB慳電泡就夠, 如果用光管, 可能需要額外既光同熱黎幫助龜龜做D3, 此情況下可用射燈幫助, 但建議距離遠d, 兩呎以上, 盡量唔好影響環境溫度

陶瓷燈: 一般提供熱, 用於夜間及冬天保溫使用, 幾乎係必備, 一般有冷氣既細地方50w, 冬天100w-150w, 大地方可能要幾支, 強烈建議配合溫控使用, 用陶瓷燈好乾燥, 請注意保濕, 以免變成烤龜

溫濕度計: 必備, 最好有兩三個, check唔同位置, 或者可以防止讀數出錯

噴水壺: 用於幫龜及底材保濕, 一日最少兩次

加濕器: 建議買濕電款式, 因為靜d, 多數有得較大細同埋容量較高, 尤其建議冬天及開冷氣時使用, 有助解決陶瓷燈乾燥問題

  紅外線測溫槍: 非人用嗰d, 推薦使用, 因為龜龜溫度可能同環境溫度有出入, 如果爬箱內加設熱點或射燈, 假設箱內31-32度, 龜龜可能已經會去到34-35度, 就算濕度夠, 長時間高溫可能會另龜龜唔適應溫差, 如果室溫係27-28度, 龜龜離開爬箱可能已經有機會流鼻水甚至感冒, 紅外線測溫槍可以大慨知道龜龜實際體溫, 從而慢慢調節爬箱內既溫度, 另也可測水溫

水兜: 比水d龜龜飲同浸, 總之唔好太高同太輕就ok, 有人建議長放, 有人唔建議, 因為有機會傳播病菌, 所以水要勤換, 建議分養病龜

底材: 一般多人用既紅土, 樹皮, 木屑, 紙粒(較適合大d既龜), 人做草皮地毯, 反轉瓷磚等都ok, 只要方便自己清潔而龜龜又唔會誤食就ok, 建議經常噴濕, 可減少灰塵同保濕, 養得生物就會有衛生問題, 所以要多加留意, 冇得懶

  微型風扇: 用於爬箱抽風, 唔係吹風, 建議放較高既位置

5. 一切從簡, 除非你毅力驚人, 如果唔係就唔好加裝飾既野, 一來住得兩三日已經面目全非, 二來清理又麻煩, 三來主人覺得靚既布置未必適合龜龜, 記住一切從簡, 實用至上
6. 全自動化, 幾個時間制同溫控, 日子耐左, 你就知道其好處
7.一般建議給躲藏處, 如山洞之類, 有人有所保留, 因為可能會令龜龜較難適應環境, 同時空間又細左, 半開放式(好似巴士站嗰d), 會較好, 當然一個安定既環境係必需
8. 如果預算太窄, 唔建議養陸龜
9. 先預備好setting後買龜, 唔好慢慢加或同一時間買, 龜可以寄放係商鋪
10.忌貪平, 買黎頂住先既心態會做成浪費

新龜入手
1.  應該只買自己鐘情龜種
2. 新手唔建議養BB(5cm以下)
3. 訓左唔代表有病
4. 主要留意有冇唔妥, 如鼻水同眼淚等, 開唔開眼, 上手有冇力爭扎, 會唔會太輕, patpat乾唔乾淨, 開唔開囗, 甲夠唔夠硬等
5. 暗病生蟲始終難防
6. 如果隻龜本身養定左, 返到屋企幫隻龜提升體溫(浸暖水或曬燈), 等龜安定便可餵食
7. 如果隻龜都係啱啱到商店(新鮮貨), 可以返到屋企幫隻龜浸三份一濃度既Reptiboost作補充, 隔兩三日先餵食
8. 多觀察龜龜既狀態, 新龜建議隔離觀察

飼養
1. 首要係等陸龜慢慢適應環境, 要仿原來野生環境, 客觀條件唔許可, 尤其係香港, 再加上而家d龜好多係人工繁殖, 體質可能已經唔同左, 高溫乾燥既仿野生環境可能會帶來反效果
2. 食材, 基本上糧加草粉已經有齊大部份營養, 建議新手當主食, 尤其係BB同豹龜, 豹龜腸胃較麻煩, 只餵糧加草粉可減少腸胃出錯既機會(但非絕對), 豹龜一般需要少水份高纖維(草,桑葉),  結石品種一般需要低草酸同低蛋白(車前,桑葉), 腿類可以雜食(甚至可以食少少肉), 但係一般草本植物(車前,桑葉,其他葉等)營養價值唔及菜, 所以一般需要加糧黎平衡飲食, 如果龜龜唔食糧, 可配合龜龜鐘意既食物(如用葉包住少少糧), 漸漸增加糧既比例, 等佢慢慢適應, 菜非毒藥, 鈣鏻比亦非絕對, 如果龜龜因環境或病而拒食, 可嘗試用菜誘食, 當龜龜長大, 建議適度增加多元化既食物, 令龜龜有足夠既營養支持生長, 仙人掌(高草酸)都可以養大隻盾臂, 亦有人餵免仔糧飼養陸龜(仲養到好大隻), 葉同菜記住要浸同洗乾淨, M糧同S糧要慢慢加水整軟, 唔好用水浸, 因糧中營養添加劑會流失
3. 份量, 其實冇標準, 隻隻龜唔同, 慢慢試下龜龜個胃口, 以下只係非常大慨既標準, M糧為例, 5cm之下BB可每日餵三份一粒M糧加草粉, 食唔哂由佢, 唔建議隔日餵, 5cm-10cm可每日餵半粒M糧加草粉, 慢慢加到一粒, 如果食唔哂就隔日餵, 怕肥既朋友一般會餵葉, 一個禮拜只餵一至兩餐糧, 10cm以上, 由於食量差距可以好大, 所以主人自己研究
4.浸水, 一般每日都應該幫龜龜浸暖水, 尤其係結石品種, 約10-15分鐘, 有需要可以浸耐d, BB唔好浸太耐, 每隻龜都應該獨自浸水, 以免交差感染, 溫度應該以室溫加三四度為適合, 唔好太熱,以免龜龜散熱出問題, 有人會以熱燈防止水溫下跌, 但係唔應該太近同過熱, 冬天建議係龜屋裡面浸水, 溫度應該以龜屋裡面溫度加三四度, 以免溫差太大, 水深約到龜龜縮頭時個鼻尖到, 浸水可以保濕, 迫龜龜飲水, 幫助排泄, 同清潔等, 有人會刷底甲幫助排泄排酸, 但係要有耐性及視乎龜龜習慣
5.曬太陽, 陸龜需要UVB黎製造維他命D3(幫助吸收鈣), 曬太陽係其中一種最好既方法, 有人話如果一星期曬太陽兩次, 每次一個鐘, 基本上可以唔冼用UVB燈, 可見陽光既重要性, 但忌暴曬, 建議帶備噴水壺及水兜, 以免龜龜脫水中暑
6. 勿胡亂改變陸龜既生活環境因同習慣, 唔好時常鐘意就加d野或者攞走d野, 龜龜食野(用兜餵)同訓覺都唔應該被打擾
7. 要時常保持清潔, 底材易有菌同發霉, 建議每日清理排泄及常換, 如怕麻煩, 建議簡d易打理既底材, 如人做草皮地毯, 反轉瓷磚等, 甚至唔用底材(唔太建議)
8. 留意龜龜有冇吹波波, 流眼淚, 唔開眼, 軟甲, 排泄正唔正常, 有冇蟲等, 成日訓唔代表有病, BB可以訓超過十八個鐘, 要留意龜龜生活習慣有冇改變, 例如平日食完飯會周圍走, 呢排食完就訓, 就要觀察, 5cm以上既結石品種要留意後腳有冇力, 有冇腫等, 豹龜要特別留意排泄正唔正常, 唔好隨便杜蟲, 有時可能一星期先有排泄, 如有需要, 如便便唔正常或有蟲可求助版友及醫生議見, 切勿胡亂施藥
9. 忌過份緊張, 以免龜龜過份嬌生慣養, 有人乜都唔用, 當龜龜係狗咁養, 都養得大, 經驗要慢慢累積

作者: mt4229 時間: 2013-8-24 13:38
本帖最後由 mt4229 於 2013-8-30 00:33 編輯

禁錯左發表, 未打完...

保健
1. Reptiboost, 含電解,益生菌同多種營養, 用於唔能夠開囗進食既爬蟲通過飲水或皮膚吸收, 必需要高濃度, 有人用於日常陸龜保健, 一般常作低濃度浸水則作用唔大(又唔可以話完全冇作用), 但係入新龜時, 可補充營養, 如有需要, 可以放少少係食物, 作補充之用, 如大病之後, 但係始終係營養, 過量冇益, 如用黎浸水, 一定要浸多次清水, 因為Reptiboost本身類似寶礦力
2. 鈣粉(要含D3), 基本上係蛋殼, 可以添加係水(建議比BB)或直接係食物度(建議較大隻為佳)作補充, 一星期一次少量, 結石品種兩星期一次少量
3. BAC, 益生菌, 用於有腸胃問題既爬蟲作補充, 一般陸龜唔需要用作日常保健

常見問題
1.結石, 結石主要成因係陸龜因為環境缺水, 龜龜忍尿, 導致草酸, 蛋白質同鈣質係膀胱結石, 由於同人類唔同, 陸龜會係膀胱結石而非只生腎石, 所以結石有機會阻塞排泄, 令毒素積聚, 併發內臟發炎, 嚴重可致命, 低草酸同低蛋白質飲食可減低結石風險, 但係主因都係缺水, 所以應該等龜龜知道環境有水, 如加水兜同提高濕度(緊要), 令龜龜多飲水少忍尿, 當然每日浸水更好, 但係要留意佢有冇飲水, 如果齋浸, 對減低結石風險幫助唔大, 浸水同時有助結石排出, 所以如果每日都排白色粉狀酸, 就應該要注意平時龜龜生活及飲食習慣
2. 隆背, 俗稱"起釘", 係龜背甲隆起呈釘狀, 一般龜友覺得起釘等於唔好睇, 影響健康, 養得唔好...等, 野生陸龜較少有起釘狀況, 至今起釘成因都未有明確結論, 一般坊間都會認為係環境, 飲食, 基因同飼養方法等, 以下係比較多人認同既觀點, 1. 生長過快, 由於食物同環境, 人工飼養既陸龜一般都會快大過野生陸龜, 生長過快可能會導致生長失調而做成起釘, 有主人會係冬天及發現背甲增生時減少龜龜進食既次數同份量(減少一半至三份二), 以免背甲生長過快, 亦有主人只餵葉唔餵糧, 以免龜龜過肥, 2. 濕度過低, 濕度過低可能會令新舊甲生長唔平均, 因為舊甲會過硬而配合唔到新甲生長, 所以有主人會以超高濕(濕度九十幾)黎飼養陸龜, 3. 龜背甲過熱, 龜係冷血動物, 要靠環境提供熱量, 龜殼係主要既吸熱工具, 但係如果龜殼長期過熱, 例如用射燈長時間近距離照射, 會導致背甲加速增生幫助散熱, 咁會增加起釘既機會, 其實以上既觀點都未經科學證實, 亦未有人攞一百幾十隻陸龜長期室內飼養做實驗, 加上野外既環境同室內有好大既出入, 所以以上既方法非靈丹妙藥, 其實作為主人, 龜龜養得大養到肥肥白白才算成功, 起唔起釘實屬次要, 請勿亂做實驗
3. 混養, 一般唔建議新手混養, 混養本身唔係完全禁止, 但係建議大地方, 分開餵食, 浸水等, 要小心細菌, 病毒同寄生蟲等交叉感染, 野生會較少聽到呢d問題係因為野生陸龜多數係獨行俠, 同時如果其中有一隻比較有攻擊性會係一個頭痛既問題, 單養一兩隻同類養得大既成功率會較高
4. 食物貯存, 一般糧同草粉之類既乾貨會較多同埋可以食好耐, 應該分開一小份, 食完再添, 以免開黎開去全部受潮, 車前草應該抹乾d葉, 但留根微濕, 放入大保鮮袋入雪櫃, 可放約10日, 如用報紙包好快會謝, 桑葉同其他葉類應該將d葉剪出黎抹乾, 放入保鮮袋入雪櫃, 可放約三至四星期

再重申, 此文非學術討論, 只係建議新手參考, 同埋只比較適用係一般室內細地方飼養既陸龜, 如果閣下有自己一套, 或者d龜冇病冇痛, 請勿胡亂改變陸龜既生活環境因同習慣, 本人都係新手, 唔保證此文正確, 請留意!

作者: elaineleung 時間: 2013-8-24 13:59
好詳盡！！！

作者: karl0513 時間: 2013-8-24 14:01
辛苦哂! 好有用

作者: chan359777 時間: 2013-8-24 14:06
非常詳細，睇晒都要啲時間，多謝分享！

作者: b21st 時間: 2013-8-24 14:06
欣賞！

作者: skclan 時間: 2013-8-24 14:23
樓主未打完可以隨時編輯的

作者: Miai 時間: 2013-8-24 15:11
加去精華POST啦等D新手可以參考下~

作者: kenny1412 時間: 2013-8-24 15:15
很好比個good你

作者: 長毛 時間: 2013-8-24 16:03
內容好詳盡，態度超正確！

作者: 小友 時間: 2013-8-24 16:50
非常詳細！

作者: dmchiu 時間: 2013-8-24 16:55

mt4229 發表於 2013-8-24 13:36
本人都係新手, 但係經過多月爬文同埋與多個資深龜友交流, 本人有d建議或者心得比新手養陸龜既朋友參考, 等 ...

多謝分享

作者: AsiaSky 時間: 2013-8-24 17:28
多謝分享。

作者: 太極龜 時間: 2013-8-24 18:04
功德無量

作者: mt4229 時間: 2013-8-24 20:38
update左d, 塊手寫版寫到壞壞地

作者: swingman1019 時間: 2013-8-24 20:43
非常有用，新手必看

作者: rickyyip944 時間: 2013-8-24 22:07
非常詳盡，多謝！一齊

呀！

作者: choichakyam 時間: 2013-8-24 22:24
多謝分享~~

作者: mt4229 時間: 2013-8-25 00:51
最多只可一萬字, 爆左

作者: hochingshing 時間: 2013-8-25 22:07
好~好~好~!!!!!!!!幫到新手~!!!!

作者: smleungaa 時間: 2013-8-26 09:56
很詳盡!
想問一下平時水盤加水會唔會加D熱水落去?
定係加D凍既就ok?
另外放水盤既位置一般會放係咩位置?(e.g.熱點)
仲有水盤要落幾多水先至方便佢飲同浸?(到龜龜身體咩位置?)

作者: mt4229 時間: 2013-8-26 11:33
回復 smleungaa 的帖子

任何時候都唔應該用煲過既水, 夏天冇所謂, 冬天放近熱點, 留意有冇阻左d龜取暖, 水位唔洗太高, 一般約1cm...

作者: rixon 時間: 2013-8-26 12:13

作者: smleungaa 時間: 2013-8-26 12:16
回復 mt4229 的帖子

我明白應該用生水,
我既意思係換水應唔應該用熱水?
因為理論上個個人屋企都有熱水爐可以加D熱既生水

作者: mt4229 時間: 2013-8-26 12:22
回復 smleungaa 的帖子

唔洗, 基本上一陣就凍哂

作者: jblancpain626 時間: 2013-8-26 13:17
辛苦哂!

作者: galen0819 時間: 2013-8-26 15:22
多謝Ching 無私既分享

作者: smleungaa 時間: 2013-8-27 12:18
Reptiboost係咪沖劑黎?
如果沖水比龜龜浸,點樣為之三分一濃度?
浸法係咪先浸一次有reptiboost既水,再浸一次清水?
岩岩返屋企既龜龜係咪一日浸一次直到兩三日後比野佢食咁樣?
如果放落食物大概要放幾多?
唔該晒!

作者: duncanbear411 時間: 2013-8-27 14:07
謝謝分享，獲益良多。

作者: mt4229 時間: 2013-8-27 18:45
回復 smleungaa 的帖子

粉狀沖劑, 樽上份量1/3, 10分鐘之後浸5分鐘水, 隻龜運送途中可能有問題, reptiboost用黎補充營養, 浸一日夠, 之后浸清水, 除非狀態好差, 狀態好既幾時餵食都唔緊要, 不過最好隔一晚, 如果餵就半粒至一粒米既份量, 但糧本身已添加營養, 故唔好成日加...

作者: smleungaa 時間: 2013-8-27 23:14
回復 mt4229 的帖子

"10分鐘之後浸5分鐘水",呢句意思係浸完reptiboost浸返五分鐘水?

作者: mt4229 時間: 2013-8-27 23:34
回復 smleungaa 的帖子

係.................

作者: aatcarllaw 時間: 2013-8-28 00:27
一萬字

,十個讚

歡迎光臨香港龜友論壇 (https://hkturtle.org/)