（忍者龜新手）第一次養龜嘅疑問

小韋寶

雖然有D長，希望各位師兄師姐幫幫小弟解答疑難  
剛剛買咗兩隻龜，忍者龜（應該係叫黃頭側頸龜），下晝買返屋企之後出街食飯，食完飯返屋企開燈望一望佢哋，兩隻龜仔就嚇到彈起。
一陣間之後我老豆喺缸度拎返啲嘢（冇拎走龜仔．．．），再嚇多嘢。
到依家，佢哋兩隻龜仔靜係哩喺浮台下面，唔夠膽出嚟．．．我同屋企人行同講嘢都嚇親佢哋。
買嗰時問個賣龜佬點養，佢就話：一個缸，少少水，一座山仔，間中比佢哋曬太陽，就可以架啦．．．（我覺得佢好晦氣．．．但見D龜又醒目又活潑，足之買咗返嚟）
我雖然第一次養，聽完佢咁講，我就覺得唔會咁簡單架嘛？！
所以我有幾樣嘢想問：
1.新買返嚟嘅龜仔要幾耐先適應新環境？係咪一粒聲都唔出去就佢哋，唔行得埋去睇佢哋．．．？因為佢哋好驚我同屋企人．．．
2.我將寜散嘅波子鋪喺底（鋪唔晒個缸底），見佢哋行到一仆一碌，係咪唔啱佢哋？
3.而家個龜缸有一個浮台，同埋頭先ｄ波子，就冇其他嘢啦，係咪仲需要其他嘢呢？（例如：水泵？）
4.其實係咪要D發熱嘅燈？因為我上網睇到佢哋呢類龜好怕凍，而家又到半夏天，屋企有開冷氣，會唔會對龜仔嚟講已經好凍？（冷氣開２４－２６度左右）
感謝你哋幫忙

ansonleung

師兄，我都養緊一只忍者，就隨便分享d經驗啦，見笑
1.忍者要幾耐先適應環境，我覺得好難一概而論，但忍者系一隻比較小膽既龜種，所以儘量將個缸擺系一個冇乜人既地方，等佢適應幾日先
2.其實波子系裝飾來既。。。我覺得擺唔擺都冇所謂，只要唔影響你換水同保持水質就ok...
3.當然仲需要一個uvb燈啦，冬天比多一個射燈佢啦，同埋最好當然有一個過濾器啦，如果唔加過濾器就勤力d換水啦
4.你講得岩，忍者系好怕凍，所以應該加一個暖管比忍者，我自己養緊既忍者就保持水溫系28-30左右，但加發熱既燈基本上好難提升水溫，用暖管比較有效率，同埋如果屋企有開冷氣既話，最好小心d冷氣系咪直吹龜缸，或者令到水溫降得比較低，因為開冷氣時候，氣溫比較低，容易造成龜龜感冒，我養左幾隻龜系房，就系因為夜晚開冷氣，導致巴西苗同草苗感冒，所以之後都好小心。

圓圓龜

補充多少少喇...忍者龜鐘意深水, 不過係苗既話又唔洗太深, 大概係龜殼長度喇...佢地好鐘意游水架, 仲好叻添

忍者龜一般都好強壯, 而且大得快同可以好大隻, 要有心理準備, 最好用濾桶喇