我應唔應該返去覆診好?

mcdull

話說上星期我隻小小紅耳 (4-5cm甲) 張咀,  仲有時側側地身游.
咁大家應該都知乜事. 開始有徵狀時就著左兩枝暖燈 (冇光) 24小時射住 30度左右.
但有一晚好似作嘔咁, 會嘔痰, 命仔緊要, 於是請一日假去睇醫生.

去左都幾有名既土瓜灣某某動物醫院, 見醫生時間十分鐘左右.
我講完佢乜事, 佢望兩望, 就開宗明義就話, 咁細隻龜, 冇乜可以做, 都係餵下藥, 意思係聽天由命. 針又打唔到.
其實都明既. 亦都知係咁. 佢嘗試抽大便驗, 但又唔覺佢吸到野出來. 唔知有冇驗到乜, 冇交代到.

跟住開藥, 話要用針筒餵, 但要塞條廿幾mm長既管入胃, 話咁先餵到. 佢示範餵一次.
佢話捉住個頭, 反開佢個口塞入去. 我O左咀, 佢個頭同細個我尾指, 10mm都冇, 結果佢都係冇塞入去.
龜仔亂張口時佢就餵左幾0.xml. 醫生話食到少少就唔迫佢了..
咁我當然問, 如果餵唔到點算? 醫生話可以拎返來幫手餵, 每次收 $170. 呀, 命仔緊要, 希望餵到.

開左既藥有一隻抗生素, 一隻化痰止咳, 一粒calcium + D3藥丸, 一瓶電解粉, 一罐腸胃糧 (貓狗果種)
盛惠$1,025. 唉... 簽咭時同自己講, 雖然都比我預期中貴, 都係命仔最緊要.

佢比左枝針筒餵藥, 好彩自己餵到, 但過三日, 枝針筒已經脫晒色 (刻度), 而且因為龜仔食左幾日藥已經唔張口, 好難餵.
仲有d膠可能有少少變型, 單手好難禁得到. 再堅持多三日, 琴日我打去診所問, 枝針筒用唔到, 同埋要餵幾耐? 之前醫生其實冇講過實際要餵幾耐藥, 只係話, 如果會好的話兩星期內就會見到佢明顯好轉.

但係診所答完我又O咀. 佢轉頭覆我話, 龜仔要上次睇計10日覆診, 食藥食到覆診為止. 我話, 吓.. 但係佢而家冇浮水亦冇張咀, 食得訓得 (本來都諗叫覆診係負責任既表現, 覺得貴唔去都係自己選擇啫). 但姑娘話... 上次同佢杜左虫, 要返來杜多次先杜得清架.
吓 (我諗)... 我隻龜來睇感冒 / 肺炎, 杜乜虫呀? 點解冇人同我講過架? 點解醫生當日冇提過要覆診架?.. 我冇出聲, 哦, 知道啦, 唔該.

大家認為, 我仲返唔返去覆診好? 同埋咁覆診, 佢一般會收幾多錢?

mcdull

仲有, 見醫生時話, 養紅耳龜要恆溫, 30度 Air, 28度水.
每日照 UVB 管8小時. 少啲都唔夠.

twbb

醫生係黃醫生定余醫生??最好搵余醫生,佢會幫你慳荷包
針筒同膠喉你試下去d龜舖問下,有d會有$20左右
龜本身點都會帶有細菌,杜虫係招牌菜,如果你隻龜便便正常可以同佢講唔駛
應診約$300,醫療行為或藥費另計

pgm4ho

我果2隻紅耳由細到大都未試過恆溫喎,,,,,全都係室溫養到現在十幾年都係睇過2次醫生
UVB管就更加冇(小時候冇錢咩器材都冇只得個大圓賿盤以前我BB時沖涼果個),,,但就日日曬一個鐘太陽,喂魚仔就咁過左十幾年

mcdull

而家夏天.. 我要開一塊加熱墊, 一枝暖燈.. 都去唔到30度. 水溫就有28.
加個泵.. 淨係長著既電器都差唔多60W. 跟住8 hrs UVB. 用26W膽...

冬天都唔知點算. 唉. 我驚夜晚有煤炭屎鬼來搵我.

mcdull

回復 twbb 的帖子

余醫生果日唔係度, 所以係黃.
細菌同虫係完完全全兩回事喎.

maxtennis

已PM, ALL THE BEST

mcdull

謝謝關心, 佢已經好轉, 而家不知幾得戚... 除左比我餵食藥果陣.

游左成朝水, 玩左咁耐, 陰天都要晒下背...

twbb

mcdull 發表於 2014-8-20 10:32
回復 twbb 的帖子

余醫生果日唔係度, 所以係黃.

黃醫生評語上比余醫生差,如果真係覆診都指明搵余醫生好d,杜虫唔一定係指有一條條識郁既虫,入菌,腸胃炎之類總之要清腸既行為大致上都係叫杜虫

mcdull

如果佢冇乜徵狀我諗都係唔覆了.
帶佢出街又多一個風險. 上次去醫院佢d冷氣凍到.

如果又用1000不如用來交電費好過

janede1314

之前我又是等唔切余醫生就睇了黃醫生，我餵左幾日已好返，但刀餵多幾日（前後十二天左右），好返後無覆診

mcdull

回復 janede1314 的帖子

係呀, 我都keep住餵.
不過個衰仔合住個咀實一實. 每晚要餵成個鐘.

janede1314

我發現如果用牙刷刷牠的上部分底板，牠就會覺得癢而開幾秒鐘金口，我就是趁這個時間用針筒打葯入口

玄武門

mcdull 發表於 2014-8-20 13:01
回復 janede1314 的帖子

係呀, 我都keep住餵.

我有隻豹b都睇過黃醫生，覆診咗幾次用咁幾千曾經好轉最後都係去咗。但係我覺得黃醫生都好好呀，係龜b感冒肺炎太難搞。強餵真係好勞心勞力，每次餵完都比bb口翕翕鬧鬼
如果行得食得好返就唔使覆診，不過穩陣覆診正常比多次杜虫藥應該都係幾百蚊。

mcdull

又係餵藥時間.....

Venum

all the best my friend. good luck!

boap

我都睇過土瓜灣
佢抽大便果次已經幫你杜咗一次蟲架啦