一人一個養龜的故事

zero_1

一人一個養龜的故事~分享下點解會養龜同發展,我好想知而且我覺得有排傾可以當聊誼

甘我講先啦~我係二十幾年前因為行街市見到一只龜龜(後尾先知佢係一只安布)好得意買左番泥而開始既

跟住養下養下有左樂趣就成日行街市想揾只母既俾佢,但係揾吾到,反而見黎見去刀係橙色同啡色的龜龜,望

望下中哂毒先先後後買左50幾只番去,七小福,十兄弟,師,團,旅,軍甘買~養落又想知咩龜,周圍望周圍睇去發

掘真相,睇得多其他品種就深陷龜界了~

蛇頸之友

10幾年前(大約1997年),  讀緊中學.某個星期6,日 同同學去旺角天光 X買魚  (當時養魚..不過成日養死哂)

見到有一檔有好多巴西龜 幾個FULL既大紅白藍的份量 , 隨手買左2隻..大膠箱..冇濾水...冇浮台/高台....長期浸水  竟然可以養到現在  (好神奇...)

2011年4月-5月 在 XWANTX  的動物版  看到有人推介這裡

一看到這個論壇  水龜D相  太毒了 ~ 又看到某位論壇義工   簽名相用蛇頸龜 睇左張相就中哂毒(雖然現在這位義工,已沒有

養蛇頸龜了, 但不知道是不是和圖中的龜有緣份 ,我在其他賣家,把這龜買回來了 哈哈,後來由義工師兄証實是同一隻龜(2012年才到我的手上 @@+)

同時間 又有一位師兄在交易區賣蛇頸苗  PM了  成功買左回家

跟著 在交易區 又有其他師兄賣蛇頸龜 又成功買左, 去到魚街又買左幾隻  買下買下 =.=現在11隻

keith0415

我就係因細路果陣  見到有d大人係到放龜  好好挽甘  到大果陣  買左水龜 買下買下就中左毒:xp

kuen少

幾個月前去朋友家見到一隻黑蛋同刀蛋，就咁比佢地吸引住，
跟住捉我朋友去帶我買，就咁就開始對龜有興趣，
之後再發現到呢度，見到龜原來都有咁多品種同可以咁互動，
興趣又再加深了。

zero_1

多謝各位分享,全部己閱~加深了對大家既了解

michaelklkka

回復 乂阿偉乂 的帖子

其實唔只TIM A...O個時玩繁殖...格唔中拎下出天光墟賣...

心寒

我呢，其實由細到大都好中意龜架，
屋企都好多龜龜嘅精品同公仔……
但以前我唔敢養龜，可能係我對自己信心唔夠啦
我覺得我總係會糟蹋左佢地……
而我都成日叮囑朋友唔好送龜比我，公仔嗰啲就得
之但係，喺我廿一歲生日嗰年(其實係3個月前………)我女朋友好唔聽話咁買了隻龜比我
嗰時開始我不停爬文，但結果還是…………
嗰時我真係超唔開心…經常回想同牙龜的生活點滴
最後，又係呢個唔聽話嘅女朋友鼓勵我重新振作
終於用了一個月時間買齊設備藥物，喺上個月買了隻百厭星

每當我反到屋企見到佢，心情就會舒服哂，所以我相信未來我都會繼續養的
不過每逢廿二號，除了和女朋友慶祝(拍拖紀念日)，我都堅持去後山拜一拜牙龜(佢4月22去的…)
當然有時得閒都會去同佢吹下水(有次比個牙伯撞見，佢以為我痴線，自己同自己講野…)
所以希望呢隻百厭星可以健健康康咁長大！
而我都計劃好遲下會買多隻，等佢地唔使咁孤單

zip

我小學一年班時考第四名爸爸送左隻巴西龜比我養，後來因為我太細照顧嘅責任當然係我爸爸啦！太約八年後我爸爸病了入左醫院半年龜龜開始唔食野，好似等我爸爸餵佢咁，過多八個月左右爸爸過身了！龜龜就一直宿在殻裡面無再出過黎，媽媽驚佢會餓死，所以就將佢放生去爸爸靈位的所在地裡的龜池，發生呢件事後我知道龜龜真係好有靈性到而家我都一直有養龜龜，而家屋企隻巴西龜都有10歲了，希望放生在爸爸那裡的龜龜和我而家的龜龜一樣身體健康啦

乂阿偉乂

michaelklkka 發表於 2012-7-6 01:44
細細個開始呀媽就養龜..同D龜一齊大....到左我12,3歲O個年...自己就開始識得走出魚街A...天光墟O個D地方買 ...

三十缸魚....

michaelklkka

細細個開始呀媽就養龜..同D龜一齊大....到左我12,3歲O個年...自己就開始識得走出魚街A...天光墟O個D地方買魚養...養魚養左幾年之後因為屋企要裝修...呀媽叫我全部D魚缸都唔好要喇..裝修完唔可以再咁樣養魚喇..O個時養左超過三十缸魚..咁呀媽叫到..冇得傾啦...無耐接受跟住留返起兩隻大D既缸O係屋企花園到養鱷魚龜喇....養到幾個月之前上黎呢度睇陸龜...愈睇就愈中意...所以而家就愛上了。其實早幾年已經愛上左鱷魚龜...覺得好有型...重有食野個樣好狼....

iamnero

細個好奇貪玩，買左3隻巴西苗返來，日日虐待，不日盡數歸西。
上高中時有活動搞生態缸，買左兩隻巴西苗兩隻草龜苗。兩隻巴西毫無意外地葬身生態缸，二草無恙。生態缸玩完后，兩隻草龜養系宿舍，擔任宿委既同學很通融，當見唔到。但有日朝早起身，冇啦啦唔見左隻，有可能系合作越獄，或成為學校里野貓的盤中餐。
剩下個隻草，用一個膠盆一直養到上大學，系大學宿舍繼續用膠盆養，冇點大過。咩腐皮爛甲之類既問題應該都有。之後要來香港，屋企爸媽又唔會幫手照顧，就俾同學阿媽拎左返屋企，聽講錫佢仲錫過個仔，好食好住。
直至上年，寂寞難耐，入左隻紅腿到而家。

boey_carson

我成世人都好怕爬蟲類同其他小動物，半年前同男朋友經過魚街，佢話好想養小隻龜仔，咁我地就周圍睇啦，睇到街尾都吾岩心水，本來諗住走人，點知有隻龜龜係咁游向我地，又附合哂我地想買既條件，所以就一見鍾情啦！佢個底d點點有d騎呢，本來我男朋友話想買另一隻同品種既，但我覺得同呢隻龜龜好似好有熟悉感咁，最後都決定買佢番黎！(不過我仍然係吾敢捉佢摸佢)買番黎頭幾個星期我都無點特別理佢，直到有次佢突然好呆滯，嚇到我同我男朋友都好驚佢有咩事，好彩餵佢食左兩片菜又活潑番啦！不過我地第二日都立即買定好多藥係屋企。。果晚我仲喊左成晚，眼都腫哂！真正感到佢係我地既一份子！而家都吾再驚龜，仲成日摸摸佢，同佢玩！

eaglerx

我細個幾歲就,,,在街市見倒龜就愛上左,,,中學無玩,,大個仔出來做野又玩,,,,,,一直到現在,,

tom5985

舊年新年..表妹係花市買左隻巴西龜,番大陸探佢個時見到隻龜就愛左上跟住番香港個時佢就送左隻龜比我.第一隻龜既由來;不過養左半年佢死左..之後買左兩隻龜黎養都係死左..
依家呢隻係.個FD去玩撈龜.揀左呢隻龜.佢養左一個星期就比我養,養到依家.0.跟住又發現左呢個論壇~~加深左我對龜既認識
最愛草龜

Koa

我成家人都好中意龜，因為有靈性，比較長命同無毛（最重要係無毛，因為我地鼻敏感）
所以我阿爸養巴西我養陸龜

kenny555

我都系兩年前開始養
一開始都系養巴西,但係果時唔識,無買任何器材,搞到死左
後來決定再買多一只巴西,果時買左一隻,返來先見原來他左手唔系好靈活..不過我無放棄他,因為他好乖,成日望住我,可能我同他有緣掛,其中都加多左一隻巴西,兩隻一直都好好感情,養到宜家..
跟住後來又養埋刀蛋,黑蛋,同鱷龜
宜家考慮到龜龜們大個以後,所以無再加過

wel524

我就因為細過果時養既寵物全部都係悲慘結局, 完全唔知點解會咁,全部都唔係病死,而係離奇地死, 十分之唔甘心, 所以長大之后有能力再養,下定決心想養好一隻寵物, 因為實在太可愛, 假日又可以响屋企陪佢地玩下, 選擇龜係因為龜比較長命, 不用傷心N次

以前既悲慘結局 eg 雞就走雞, 龜就離奇地死(, eg有一隻放入洗手盆游水食野,最后發現响地下唔郁,應該係爬唔到出去, 水位仲有一段距離T.T, 又有一隻被人打翻左龜箱后,搵極隻龜都搵唔到, 最后洗鞋果時發現响洗衣機T.T)

zero_1

wongfafa 發表於 2012-7-5 23:25
回復 zero_1 的帖子

係咩龜咁厲害…可以吸引你呀？

橙色係三線同石金,

啡色係草...

嗰時呢3種龜周圍刀係,但又真係好令

ah林-3-

肥仔龜龜 發表於 2012-7-5 23:25
系2000fun睇睇下倉鼠禁左去爬蟲區
自此就中毒....

哈哈,陸龜我都係呀~
我之前養緊水龜果陣都吾知有陸龜呢家野,你話低吾低笑先`
之後就慢慢禁左陸龜版睇ching/ching姐啲帖..自此就養左陸龜;

肥仔龜龜

系2000fun睇睇下倉鼠禁左去爬蟲區
自此就中毒....